வீதிப் போக்குவரத்து அனுமதிகள் இன்றி பயணிகளின் தேவைக்கு ஏற்ப பேரூந்துகள் சேவையில் ஈடுபட முடியும் எனவும் அரசாங்கம் இன்று இரவு பணித்துள்ளது.
வேலை நிறுத்தப் போராட்டத்தில் ஈடுபட்டுள்ள ரயில் இயந்திர சாரதிகள், ரயில் காப்பாளர்கள் கோட்டை பேரூந்து நிலையத்திற்குச் சென்று பேரூந்துகளை பணியில் ஈடுபட அனுமதிக்காது தடுத்து நிறுத்தினர்.
சேவையில் ஈடுபடாமல் பேரூந்துகளை ரயில் இயந்திர சாரதிகள் தடுத்தமையினால், பெருமளவு பயணிகள் கோட்டை, புறக்கோட்டை பேருந்து நிலையங்களில் நீண்ட நேரம் காத்திருந்தனர்.
ஆத்திரமடைந்த பயணிகள் பலர் கோட்டை புகையிரத நிலையத்திற்கு அருகில் எதிர்ப்பு ஆர்ப்பாட்டம் ஒன்றிலும் ஈடுபட்டுள்ளனர்.
இதனால் கோட்டை, புறக்கோட்டை பிரதேசங்களில் போக்குவரத்து நெரிசல் ஏற்பட்டதுடன் பதற்றமும் நிலவியது. பொலிஸாரும் கலகமடக்கும் பொலிஸாரும் பெருமளவில் குவிக்கப்பட்டுள்ளனர்.
விசேட அதிரடிப்படையினர் கோட்டை ரயில் நிலையத்தைச் சுற்றிவளைத்து காவல் புரிந்தனர். பயணிகளுக்கும் ரயில் இயந்திர சாரதிகள், ரயில் காப்பாளர்களுக்கும் இடையே கைகலப்பும் ஏற்பட்டது.
ரயில் சேவை ஊழியர்களுக்கு சம்பள உயர்வு வழங்கப்பட வேண்டும் என அமைச்சர் ராஜித சேனரட்ன, கடந்த அமைச்சரவைக் கூட்டத்தில் பரிந்துரைத்தார்.
ஆனால் அமைச்சர் மங்கள சமரவீர, நிதியமைச்சர் என்ற முறையில் அந்த சம்பளவு உயர்வுக்கு அனுமதியளிக்கவில்லை.
இதனால் அமைச்சரவைக் கூட்டத்தில் இரு அமைச்சர்களுக்கும் இடையே கடும் வாக்குவாதம் ஏற்பட்டிருந்தது. முதுகெலும்பு இல்லாத அமைச்சரவை இதுதான் என அமைச்சர் மங்கள சமரவீரவும் கூறியிருந்தார்.
இந்த இரு அமைச்சர்களின் மோதலின் பின்னணியிலேயே இன்றைய வேலை நிறுத்தப் போராட்டம் நடைபெறுவதாக கொழும்புத் தகவல்கள் கூறுகின்றன.