செய்தி: நிரல்
ஒக். 19 23:00

சுட்டுப் படுகொலை செய்யப்பட்ட ஊடகவியலாளர் நிமலலராஜனின் 18 ஆவது ஆண்டு நினைவேந்தல்

ஈழத்தமிழ் மக்களது இன்னல்களை பேனாமுனையால் வெளியுலகிற்கு தெரியப்படுத்திய துணிச்சலான ஊடகவியலாளர் மயில்வாகனம் நிமலராஜனின் 18 ஆவது ஆண்டு நினைவேந்தல் இன்று தமிழர் தாயகப் பகுதிகளான வடக்கு கிழக்கில் அனுட்டிக்கப்பட்டது. பேனா முனையால் மக்களின் குரலாக எதிரொலித்த நிமலராஜனது நினைவேந்தல் யாழ் ஊடக அமையம் யாழ்ப்பாண பல்கலைக்கழகம் மற்றும் மட்டக்களப்பு காந்தி பூங்காவிலும் இடம்பெற்றது. யாழ். ஊடக அமையத்தின் ஏற்பாட்டில் யாழ்ப்பாணம் மாநகர மைதானத்திற்கு முன்பாக அமைந்துள்ள ஊடகவியலாளர் நினைவுத்தூபியில் இன்று பிற்பகல் நினைவுத் தூபிக்கு மலர் மாலை அணிவிக்கப்பட்டு அஞ்சலி செலுத்தப்பட்டது.
ஒக். 19 21:49

மன்னார் - முசலி பிரதேச செயலாளருக்கு எதிரான விசாரணைகள் ஆரம்பம்?

(மன்னார், ஈழம்) மன்னார் மாவட்டத்தின் முசலி பிரதேச செயலாளர் பக்கச்சார்பாக செயற்படுவதுடன் ஒரு சாராருக்கு அநீதி இழைக்கப்படுவதாகவும், இது தொடர்பில் நடவடிக்கை எடுக்குமாறும் வலியுறுத்தி பிரதேச மக்கள் மேற்கொண்ட கண்டன ஆர்ப்பாட்டத்தை அடுத்து, பிரதேச செயலாளர் சுப்பிரமணியம் வசந்தகுமாருக்கு எதிராக உடனடியாக விசாரணைகளை மேற்கொள்ளுமாறு, மன்னார் அரச அதிபர் கிறிஸ்தோபர் அன்ரன் மோகன்ராஜ் மாவட்ட மேலதிக அரசாங்க அதிபருக்கு உத்தரவிட்டுள்ளார். முசலி பிரதேச செயலாளருக்கு எதிராக மாவட்ட அரசாங்க அதிபருக்கு ஏற்கனவே பல முறைப்பாடுகள் முன்வைக்கப்பட்ட நிலையில், இதுவரை அது குறித்து எவ்வித விசாரணையும் நடத்தப்படவில்லை எனத் தெரிவித்து கடந்த 15 ஆம் திகதி திங்கட்கிழமை மன்னார் நகரில் பாரிய கண்டன ஆர்ப்பாட்டம் ஒன்றை முசலி மக்கள் மேற்கொண்டனர்.
ஒக். 18 22:30

பதுளையில் ஆசிரியர் பற்றாக்குறையை நிவர்த்தி செய்யுமாறு வலியுறுத்தி கையெழுத்துப் போராட்டம்

(மலையகம்) மலையக தோட்டத் தொழிலாளர்கள் தமது வேதனத்தை அதிகரித்துத் தருமாறு வலியுறுத்தி பல வழிகளிலும் கண்டனப் போராட்டத்தை முன்னெடுத்துவரும் நிலையில், பதுளை மாவட்டத்தில் உள்ள பாடசாலைகளுக்கான ஆசிரியர் பற்றாக்குறையை நிவர்த்தி செய்யுமாறு வலியுறுத்தி கையெழுத்துப் போராட்டம் ஆரம்பிக்கப்பட்டுள்ளது. பதுளை மாவட்ட பாடசாலைகளில் நிலவும் ஆசிரியர் பற்றாக்குறையுடன் கூடியதாக நூலகம், ஆய்வுகூடம் மற்றும் கட்டடங்களுக்கான நிதியை ஒதுக்கீடு செய்யுமாறும் வலியுறுத்தி இன்றைய தினம் பதுளை நகரில் கையெழுத்து திரட்டும் நடவடிக்கை மேற்கொள்ளப்பட்டுள்ளது.
ஒக். 18 21:52

பூந்தோட்டம் செல்லும் பிரதான வீதியைப் பயன்படுத்துவதற்கு அச்சமாக உள்ளதாக மக்கள் விசனம்

(வவுனியா, ஈழம்) இலங்கையில் மேற்கொள்ளப்படும் அபிவிருத்தித் திட்டங்கள் நகரை அண்டிய பகுதிகளோடு முடிவடைந்து விடுவதால் கிராமப்புற மக்கள் அடிப்படை வசதிகள் கூட இன்றி அல்லலுறுவதாக வவுனியா - குடியிருப்பு பகுதியிலிருந்து பூந்தோட்டம் செல்லும் பிரதான வீதியைப் பயன்படுத்தும் மக்கள் விசனம் வெளியிட்டுள்ளனர். குடியிருப்பு பகுதியிலிருந்து பூந்தோட்டம் செல்லும் பிரதான வீதி நீண்ட காலமாக புனரமைக்கப்படாத காரணத்தால் பாடசாலை மாணவர்கள், முச்சக்கரவண்டிகள், துவிச்சக்கரவண்டியில் பயணம் மேற்கொள்பவர்கள் உட்பட அப்பகுதி வாழ் மக்கள் அனைவரும் கடும் நெருக்கடிகளுக்கு ஆளாகுவதுடன் பாடசாலை மாணவர்கள் அடிக்கடி விபத்துக்களுக்கு முகம் கொடுத்து வருவதாகவும் சுட்டிக்காட்டியுள்ளனர்.
ஒக். 18 09:02

காணாமல் ஆக்கப்பட்டோரின் உறவினர்களுக்கு மாதாந்தம் ஆறாயிரம் ரூபா?

(யாழ்ப்பாணம், ஈழம் ) வலிந்து காணாமல் ஆக்கப்பட்டுள்ளோரின் உறவினர்களுக்கான இழப்பீட்டுத் தொகையாக மாதாந்தம் ஆறாயிரம் ரூபா வழங்குமாறு மைத்திரி - ரணில் தலைமையிலான இலங்கை ஒற்றையாட்சி அரசாங்கத்திடம் தாம் பரிந்துரைத்துள்ளதாக இலங்கை அரசாங்கத்தினால் நியமிக்கப்பட்டுள்ள காணாமல் போனோர் அலுவலகத்தின் தலைவரான ஜனாதிபதி சட்டத்தரணி சாலிய பீரிஸ் தெரிவித்துள்ளார். எனினும் இந்த ஆறாயிரம் ரூபா கொடுப்பனவை அரசாங்கம் அங்கீகரித்துள்ளமையானது 1 வருடத்துக்கும் மேலாக தங்களால் மேற்கொள்ளப்பட்டுவரும் தேடுதல் போராட்டத்தை மழுங்கடிக்கச் செய்யும் முயற்றி என முல்லைத்தீவைச் சேர்ந்த வலிந்து காணாமல் ஆக்கப்பட்டோரின் உறவினர்கள் விசனம் வெளியிட்டுள்ளனர்.